ዶክተር መረራ ጉዲና ሁለት እጃቸውን ወደ ኋላ በካቴና ታስረው ፍርድ ቤት ቀረቡ

0

ታዋቂው ፖለቲከኛና የፖለቲካ ሳይንስ መምህር ዶክተር መረራ ጉዲና ሁለት እጃቸውን ወደ ኋላ በካቴና ታስረው ፍርድ ቤት ቀረቡ።

በዘረፋ የታሰሩ እንዲሁም ነፍስ ያጠፉ ግለሰቦች ላይ የማይፈጸም ድርጊት ዶክተር መረራ ላይ መከሰቱ አነጋጋሪ ሆኗል።
ዶክተር መረራ ጉዲና ሁለት እጃቸውን ወደ ኋላ በካቴና ታስረው ፍርድ ቤት የማቅረቡ ርምጃ እሳቸውን በማዋረድ የደጋፊዎቻቸውን ቅስም ለመስበር ነው የሚለው የበርካቶች እምነት ነው። እርምጃው ደግሞ ቁጣን የሚቀሰቅስ መሆኑን የፖለቲካ ምሁራን ይናገራሉ።

በኢትዮጵያ ፖለቲካ ውስጥ ጉልህ ሚና ይዘው የቆዩት የኦሮሞ ፌደራሊስት ኮንግረስ ፕሬዝዳንት ዶክተር መረራ ጉዲና በአውሮፓ ሕብረት ግብዣ ቤልጂየም ብራስልስ መገኘታቸውን ተከትሎ የአስቸኳይ ጊዜ አዋጅ ጥሰሃል በሚል መታሰራቸው ሲታወስ ቆይቶ ክሱ ወደ አሸባሪነት መለወጡ ይታወቃል።

ከሩብ ክፍለ ዘመን በላይ በአዲስ አበባ ዩኒቨርስቲ ያስተማሩትና ከዛሬ 40 አመት በፊት ጀምሮ በኢትዮጵያ ፖለቲካ ትግል ውስጥ ተሳታፊና የለውጥና የመብት አቀንቃኝ የሆኑት ዶክተር መረራ ጉዲና የአዲስ አበባ ዩኒቨርስቲ ያለጊዜያቸው በጡረታ እንዲወጡ ያደረጋቸው ሲሆን አስፈላጊውን መመዘኛ አሟልተው የፕሮፌሰርነት ማእረግ እንደተነፈጉም ለኢሳት መግለጻቸው ይታወሳል።
ለረዥም ጊዜ ከኖሩበት ቤት መባረራቸውንም ተከትሎ አዲስ አበባ ጫፍ ላይ ተጀምሮ ወዳላለቀ ቤት መግባታቸውን ማስታወስ ተችሏል።

ዶክተር መረራ ጉዲና ሁለት እጃቸውን በካቴና ወደኋላ ታስረው ፍርድ ቤት የቀረቡት ዛሬ ማክሰኞ ሐምሌ 25/2009 እንደሆነም ታውቋል። በነፍስ ማጥፋት፣ በዘረፋ፣ እንዲሁም በተራ ስርቆትም ሆነ በሌላ ወንጀልና በፖለቲካ ጭምር የታሰሩ በአብዛኛው በካቴና በማይታሰሩበት ሁኔታ እኚህን ታዋቂ ምሁርና ፖለቲከኛ በካቴና አስረው ፍርድ ቤት ያቀረቡበት ምክንያት አልታወቀም።