ህወሃት ከብአዴን ጋር ከወሰን ጋር በተያያዘ ያደረገዉን ስምምነት በተመለከተ ለአባላቱ በፃፈዉ ፅሁፍ፤ አቶ ገዱ አንዳርጋቸዉን ከስልጣን ሊያስነሳዉ እንዳቀደ ታወቀ

0

ህወሓት ጳጉሜ 1 ቀን 2009 ዓ/ም ከብአዴን ጋር ከወሰን ጋር በተያያዘ ያደረገውን ስምምነት በተመለከተ በአገር ውስጥ እና ከአገር ውጭ ያሉ ከፍተኛ አመራሮቹ ማብራሪያ በመጠየቃቸው ለጥያቄያቸው መልስ የሰጠበት  ፅሁፍ እጃችን ገብቷል። ጽሁፉንም እንደሚከተለዉ አቅርበነዋል።

እንደሚታወቀው በትግራይ ክልል ምዕራባዊ ዞን ከማንነትና ከመሬት ጋር በተያያዘ ጥያቄዎች ተነስተው እንደነበር ይታወቃል። በመሆኑም በመጀመሪያ ጥያቄውን ስንገመግመው የህዝብ ጥያቄ እንዳልሆነ እና የትምክህተኞች ጥያቄ እንደነበር ገምግመን ጉዳዩን ብአዴን እና የክልሉ መንግስት መፍትሄ እዲሰጠው ነግረን ነበር። ሆኖም ብአዴን ሊፈታው እንዳልቻለና ጉዳዩ በመካከለኛና በዝቅተኛ ደረጃ የሚገኙ የብአዴን ሰዎች የትምክህተኛውን ጥያቄ በመደገፍ እና በማራገብ ነገሩን ወደ ህዝብ በማውረድ ከፍተኛ ችግሮች ተፈጠሩ። ከዚያም እንደ ኢህአዴግ ባየነው ሰአትም ከፍኛው አመራርም በትምክህተኛው አስተሳሰብ ሰለባ ሁኖ ተገኘ፣ በወቅቱም ጉዳዩ ወደ አልሆነ አቅጣጫ ሲቀየር የብአዴን ነባር አመራሮች ለጉዳዩ መፍትሄ ለመስጠት እነ ጓድ በረከት እና ጓድ አዲሱ የተወሰኑ አመራሮችን በመያዝ ተንቀሳቀሱ። በወቅቱ የህወሓት ሰዎች ዝምታን እንድናደርግ ነገሩን። ነገር ግን እነሱ በክልሉ በመሄድ ባደረጉት ውይይትና ግምገማ ከከፍተኛ አመራር እስከ ዝቅተኛው ድረስ በትምክህት አመለካከት የተበከሉ ናቸው።

ጉዳዩ እጅግ አስቸጋሪ ስለሆነ ከፌደራል የተውጣጣ ቡድን ተቋቁሞ እዲታይ ጓድ በረከት ባቀረበው የመፍቴሄ ሃሳብ መሰረት ከመከላከያ፣ ከብሔራዊ መረጃና ደህንነት፣ ከፊዴሪሽን ምክርቤት፣ ከፊዴራል ጉዳዮች የተወጣጡ ሰዎች የሚገኙበት ቡድን ጉዳዩን እዲያዩት ተደረገ። ጥናቱ የብአዴን መካከለኛና ዝቅተኛ ካድሬዎች እንዲሁም ከፍተኛ አመራሮች በችግሩ ውስጥ ተዘፍቀው ተገኙ። በዚህም በአደረግነው ግምገማ እነ ጓድ በረከት በክልል ደረጃ በተደረገው ግምገማ ሰዎችን የመለየት ስራ በመስራታቸው፣ በመጀመሪያ ከማባረርና ከማሰር ይልቅ ይህን የተከማቸን ኃይል የመበተን ስራ መሰራት ስለነበር መካከለኛው እና ዝቅተኛው አመራር ውስጥ የሚገኙ ፅንፈኞችን በማገድ የተወሰነውን በመቀየርና በማውረድ ኃይሉ ቀነሰ። ከዚያም ከከፍተኛ አመራሩ ውስጥ የሚገኙትን ደግሞ በፕወዛ መልክ ወደ ፊዴራልና ሌሎች ቦታዎች በማዛወር የነበረው ጫና እዲቀንስ ተደረገ።

በተለይ ገዱ አንዳርጋቸው በነበረው ርካሽ ተወዳጅነት በተወሰኑ የህብረተሰብ ክፍሎችና አመራሮች ድጋፍ ስለነበረው በዚህ ሰው ላይ በወቅቱ እርምጃ መውሰድ ከጥቅሙ ይልቅ ጉዳቱ ስለሚያመዝን ምንም እንኩዋን እልህ አስጨራሽ ቢሆንም በተከታታይ ስራዎች ይህን ሰው ከህዝብና ከአመራሩ የመነጠል ስራዎች ተሰርተዋል። በዚህም መነሻነት ከቅማንት ብሔረሰብ ጋር የተሰራው የሰብዓዊ ጥሰትን በዋነኛነት እሱ ተጠያቂ እንደሆነ እና ሌሎች ተዛማጅ ችግሮች እንዳሉበት በማጋለጥ ወደ ሚፈለገው አቅጣጫ በመምራት ጳጉሜ 1 ቀን 2009 ዓ/ም አይደለም ወልቃይትን ሌሎችን፣ እነግጨውን ጭምር የትግራይ ክልል መሬት መሆናቸውን ራሱ በአንደበቱ  እዲናገርና ፊርማውን እዲያስቀምጥ ተደርጓል።

በመሆኑም ይህ ሰው ያደረጋቸው ንግግሮችና ፊርማውን ጭምር በትግራይ መገናኛ ብዙሃን፣ በቴሌቪዥን፣ በወይን ጋዜጣ እና በኢቢሲ፣ በሬዲዩ ፋና፣ በአብዩታዊ ዲሞክራሲ ጋዜጣ፣ በግል ሚዲያዎች በይፋ ለህብረተሰቡ የመንገርና የማሳየት ስራዎች በተከታታይ እንዲቀርቡ ይደረጋል። ከዚያም ይህ ሰው ከህዝብና ከአባሉ ይነጠላል፣ በመጨረሻም በክልሉ፣ ልክ እንደ ኦሮሚያና ደቡብ እንዳደረግነው እጅግ ጥንቃቄ በተሞላበት ከትምክህትና ከጠባብ አመለካከት የፀዳ ህወሓትን እንደ አጋር ድርጅት እንጂ በጠላትነት የማይመለከት ሰው በእሱ ምትክ የመሾም ስራ ይሰራል ።

በመጨረሻም ሌሎች እንዲማሩ ይህን ግለሰብ የኢትዮጲያ ሰብዓዊ ኮሚሽን ቅማንትን በተመለከተ ያጣራውን የመብት ጥሰትና ከመከላከያ እና ከደህንነት በተሰበሰበው መረጃ መሰረት እሱን እና መሰሎቹን በህግ የሚጠየቁበት መንገዶች እዲመቻቹ ይሆናል። እናንተ የህወሓት ታጋዮችና አመራሮች ልትገነዘቡልን የምንፈልገው ከዚህ ድል የደረስነው እጅግ ፈታኝና አስቸጋሪ የሆኑ ብዙ መሰናክሎችን ተወጥተን መሆኑን ነዉ። የነበረውን አጠቃላይ እንቅስቃሴ በጉባዔያችን የምናቀርበው ሲሆን ለዚህ ውጤት መገኘት ድጋፍ ላደረጋችሁ በሙሉ እያመሰገን፣ አሁንም እጅግ ውስብስብ ነገሮች ሊገጥሙን እንደሚችሉ ተገንዝበን ሳንዘናጋ ትግላችንን አጠንክረን መታገል እዳለብን እናሳስባለን።

ድል ለህዝብ!!!